2009/02/23

يوم فى الحسين..


مش عارفه قلبى كان حاسس والا ايه؟؟؟؟!!!

انا قضيت اليوم النهارده فى الحسين!!!
لا جديد تحت الشمس...


اول ما رحت كان كلى عيون مستنيه اشوف اى اثار للموضوع اللى حصل امبارح وسألت الناس اللى كانوا فاتحين المحالات فى خان الخليلى.. ضحكوا !!! لان الموضوع لا يتعدى كونه "بمبه"

حاجه لعب عيال
انا شخصيا كنت زمااااااان بعملها بعلبه صفيح وافضى فيها محتويات كيس من البمب وارميها فى الشارع فى رمضان ساعة المدفع
وكان اللى بيحصل لا يمكن ان يوصف بأقل من انفجااار
اللى حصل فى الحسين مش ازيد من كده...

طب الست ماتت ازااااااى؟؟؟؟؟
لعب العيال قلب بجد فحدث ما لا يحمد عقباه
ال"بمبه"
فرقعت ع الارض والناس كانوا قاعدين ع الرصيف حجر الرصيف اللى اتكسر نزل عليها قضاء وقدر.. حتى اذا جت csi حيقولوا كده والاصابات اللى قالوا عليها طفيفه شوية خرابيش.....

المكان مليان عساكر بشكل مضحك
وفيه سياح عدد معقول زى العادى من اول السنه مش خايفيين ومرعوبين
بس مبحلقين فى الكاميرات اللى بتصور طول النهار "ولا حاجه" ايه القناوات اللى ماصدقت دى؟؟
ومبحلقين اكتر فى العمال اللى بيصلحوا الرصيف مع ان اللى حصل فيه كان صعب تلاحظه الا اذا دققت اوى...


بالذمه مش حاجه تكسف؟؟؟
مصر تهتز بهذه القوه...
من اجل" بمبه"!!!!!!!!!!!!!!!!!!!!!!!!!!!!!!!!!!



2009/02/22

fire worksفى الحسين


انفجار حى الحسين!!
اخر مسمار
فى
نعش السياحه
المصريه
......
يا ترى اللى ضرب البمبه مين؟؟
ا-الارهابى المعتوه
ب-اللى قتل هبه ونادين
ج-انا وانت ورقصهم يا جدع
------





2009/02/15

قِسمه...


القِسمه قسمت الناس نصين

نص طحين

ونص ملتوت فى العجين

متقولش انت مين وانا مين

كلنا فى الرحايا مطحونين

كلنا من طين مش من عجين

فوق يا مسكين

كلنا لها

2009/02/13

كلنا بنحبها..



جوايا قلب شجر مقلوع
بعطش اليكى واحن واجوع
يا اللى انت حبك حريه
فى العشق اه ولا شىء ممنوع
يا سمره
شافيفك لما بتتنهد
انا بستشهد وبعيش فى النار
عيونك لما بتتلفت
انا بتفتفت ملحقش احتار
ضمينى خدينى انا لاجئ
لاول مره بكون صادق
موتنى العشق ومش فارق
ليل والا نهار
يا سمره
الجنه قصادى بتتفتح
عينيكى بتسكت وتلمح
وتقول اسرار
هزينى بسحرك من جوه
دا انا قلبى لا حول ولا قوه
ضد التيار
انا عارف انى ماليش دية
فى عنيكى ديه
ف اخر المشوار
ضمينى خدينى انا لاجئ
ولاول مره بكون صادق
موتنى العشق ومش فارق
ليل والا نهار

يا سمره




2009/02/12

he is free....


الحمد لله فيليب خرج امبارح
10000 مبروك
هل استعاد حريته..لا احد يعلم

عقبال باقى الناس اللى جوه من غير اى سبب وجيه.......

وربنا يستر ع اللى بره



حمدالله على سلامتك يا فيليب

2009/02/09

تضامننا مع فليب رزق سجين فلسطين وضد سياسة الاحتجاز والاختفاء القسرى



تضامننا مع فليب رزق سجين فلسطين وضد سياسة الاحتجاز والاختفاء !!!!


فليب رزق

طالب بالجامعة الامريكية - دراسات عليا

مخرج افلام تسجيلة

ناشط باللجنة الشعبية لمساندة الشعب الفلسطينى
تهمتة ...
الدفاع عن الشعب الفلسطينى
تهمتة الدفاع عن الانسان المقهور فى كل مكان ...
تهمتة انه لا يرضى بالظلم والقهر والحصار على غزة
فليب رزق مصرى جديد فى سجون مبارك
اختطف يوم الجمعة 6 فبراير بعد احدى فاعليات اللجنة الشعبية لمساندة الشعب الفلسطينى
فليب الذى كان يحاول بقدر ما امكنته المحاولة فى الدفاع عن المحاصرين فى غزة وضد الهجمة الصهيونية والحرب البربرية
بالتظاهر والمسيرات وبالكاميرا يرصد وقائع الانتهاك والقمع والترحيل
الحرية لفليب
الحرية والخبز لكل الشعب


--------------------------------
اللينك ده عن فيلمه الرائع "صمود"
من قلب غزه اثناء الحصار...
http://www.elbadeel.net/index.php?option=com_content&task=view&id=42779&Itemid=40


هو مخطوف ليه وازاى؟؟؟؟؟؟؟

http://anhri.net/egypt/nadeem/2009/pr0207.shtml


2009/02/08

انا ام العروسه



























مش حاقدر احكى فرحتى لان الفرحه بس تتحس والحمد لله الاحساس وصل لاصحابه...

كأنه كان حلمى انا
بجد انا حسيت انى ام العروسه...
مي صحبتى وغاليه عندى بلا حدود
اللى هى كتبته كنت حريصه انى ماقراهوش قبل ما تنشره...
وكان عندى حق انى احكم فضولى واهتمامى
ضبط النفس

والنهارده لما قريت اللى اتكتب مصدقتش نفسى!!!!!
نقطه ميه فى قلب الصحرا تبل الريق
نسمه بارده فى عز الصيف ..وانت عرقان وزهقان..
شال كشمير دافى وناعم يلفك وانت بترتعش من البرد
لاااااااااا
اللى مي كتبته احلى من كده
عارف حلاوه ونعومه الشوكلاته السوسريه المفتخره
لما تكون مستفرد بيها
وف نفس ذات الوقت بتسمع فيروز
فى بلكونه والدنيا بتمطر
وانت ورا الازاز
دايب فى الشكولاته والمطر وصوت فيروز
لاااا لاااا لاااا
اللى مى كتبته احلى بكتييييير من كده
مش مصدقين؟؟
اللى مي كتبته

ختم مغادره

لازم تقروه والحكم ليكوا انتوا
ومين يشهد للعروسه؟؟؟؟؟!!!!!
اما عن مشيره...
مش عارفه اقول ايه البنت اضمحلت من الكسوف
لدرجه ان حفل التوقيع كان سرى!!

محدش قالها غير قبلها بيوم...
وتقريبا كانت بتفقد 1\4 متر من طولها
كل ما حد يقولها وقعى!!!


الا انى اتنبأ من اول كلمه كتبتها انها حتبقى كاتبه كبيره اوىىىىىىىىىىىىىىىىىىىىىىىىىىىىىىى
وده ان شاء الله قريب اوىىىىىىى
فاتيما روح القلب سربت حبه حاجات من الكنترول...
والنصيحه اوعى يفوتك الكتاب ده...
وسيب الكلام الحلو يطبطب على روحك شويه

حاجه سابت عندى علامه مش عاديه
ان توصف مؤلافاتهم من ناقد قدير بالطازجه.. الناضجه..البكر

فهى خلطه من التميز لا يستهان بها....
ربنا يوفقهم ويحميهم
وعقبال عندكووووووووو جميعا





2009/02/06

اخييييييرا



















احساس جميل
ان اعز اصحابك
يكون فرحان

انه يوصل لتحقيق حلمه...
الجميله
الحبيبه
مي هانم بهاء

توقع على اول انتاجها
بالمشاركه
مع
مشيره هانم محمود
فى دويتو رائع التناغم
من القصه القصيره والاشعار
حفل التوقيع


حفل التوقيع يوم السبت السابع من فبراير
بالمركز الدولي للتنمية الثقافية بالدقي الساعة
6
ميدان فينى