عم عدس

عم عدس

مش عارفه ايه الحكايه
انا قولتله انى حكتب عن حد ..انت فكرتنى بيه
وسافرت يومين ..طول اليومين جالى مليون فكرة بوست
على شوية ابيات احساسهم جوايا بس الكلمات اتبخرت ..كنت بطبخ والشفاط شغال :o)
الغريبه ان من ساعة ما قلتله ..لعنة هذا البوست اصابت الافكار والكلمات
يبقى الحل ..احرر بوست حتى تعيش افكارى وكلمتى واشعارى بسلام...


انا مش بنت ماما ..انا بنت نانا

جدتى هى احلى حاجه فى الدنيا..وانا طول حياتى كنت معاها

بيت بابا وماما كان فى نفس الشارع..وانا جدو ونانا استولوا عليا لان بابا وماما كانوا مشغوووولييين اوى

دكاتره بقى حنعمل ايه؟؟؟

فى البيت الكبير..

اللى فعلا كبير

7 اوض!!!

كنت بلاقى مليون حاجه اعملها والعب واتشاقى وادعبسسس

وانا صغيره اتعودت اسمع الباعه الجائلين من جوه البيت لانه دور اول

ودايما كانوا يطلعوا يخبطوا يمكن الست "نانا"ترضى تشترى منهم
طول النهار..

بعد المغرب ..كنت بسمع صوت..متقدرش تميز اذا كان ست والا راجل والا طفل!!

انا كنت بترعب اول ما اسمعه و يا فكيييك
تلاقينى تحت السرير...

سنين طويله والصوت لا يعنى لى الا الرعب..خصوصا انه بيبقى فى وقت متأخر ومش فاهمه بيقول ايه؟؟؟
بدأت بعد كده بدل تحت السرير مبقاش مريح زى زمان (الحجم له احكام)

اطمن نفسى بانى ابقىى جنب حد من الناس اللى فى البيت

لحد اولى ثانوى

تاتااااا
اكتشفت ان صاحب الصوت بيقول"تسالى يالووووووووووز"
وان ده" عم عدس"...بتاع السودانى

بدأت انزل مع الداده نجيب سودانى منه وكانت المفاجأه

عم عدس اللى طول عمرى بجرى استخبى منه..راجل وشه شبه البيبيهات

عينيه ملونه ووشه مدور وشعره ابيض كله خفيف وقصير

حاجه كده بونبونى خالص متخوفش

ومن كتر ما هو ابيض ..كان تحميص السودانى كل يوم حوله للون احمر تحب تبصله

والسوددانى كان دايما سخن...
بيبيعه بطريقه غريبه جدا!!!

معاه علبة صلصه من الصغيره اوى دى بيملاها سودانى ..تاخدلها يالكتييير حبتين او تلاته سودانى بقشره

ونانا كانت تحب الكتير.. كده عشان اللمه

يفضل يملى العلبه ويحطلى فى الكيس وانااصلا مش ببقى شايفه العلبه مليانه والا لا!!
يطلع عينه فى العد وانا مبسوطه انى شايفه هذا الرجل الجميل...بس الوقفه جنبه تنقط....
فضلت اشترى منه بنفس لحد ما دخلت الجامعه...

وبعدين بطلتت بقى عشان حجمى مش ناقص..دايت وكده

الناس كانت بتحكى عن عم عدس العجب

انه غنى وعنده عمارات..ولاده اللى دكتور واللى مهندس !!

لكنه ِبقى على شغلته اللى عمل منها كل ده!!

مرت الايام واختفى صوت عم عدس ..

لا اعلم ان كان على قيد الحياه او لا

رحمه الله حيا او ميتا...

وما اعرفه انه حيا فى ذاكرتى..اللى يقابلنى قريب ممكن اقلدله صوت "عم عدس"

اهداء الى" البجعه السمراء"بلون الطيبه والحكمه

اتمنى ان يفصل بيننا وبين اجمل تغريداتك الكثيييييير من الايام والليالى

خبر جامد جامد جااااااااامد

انا شفت فاتيمااااا يا منززززززززز

مش عارفه اقول ايه بس ملحقتش اقولها واقولها

بس على الاقل شفتها

بعد ما كانت فاتيما عندى روح وكلام مكتوب على خلفيه بنى وبيج

كانت بتلفنى بدفا قلبها وهى بتلف على المدونات كلها

تقرا وتعلق بكل امانه

بعد ما كانت بس صورة واحده لابسه ابيض وشايله بيبى وباصين من الشباك!!

مش مصدقه..نص دقيقه..واختفت

وطمعانه فى مرات كتير نتقابل فيها..مش حفقد الامل

قلتلها فتفوته من اللى حسيت بيه نحيتها من قبل ما شوفها

(لو ربنا رزقنى بولاد نفسى ابقى ام زيك..يا ام يوسف...ولو ينفع نختار كنت اتمنى انك تبقى ماما)

بجد بجد كلام من قلبى ..ومش حخبى ان قلبى معبى

مليان حب وتقدير لانسانه..بجد انسانه

وبجد تستاهل التقديروالحب وكل الخير

ومن كل قلبى بدعى ان كل امنياتك تتحقق...عشان عارفه ان كل اللى فى قلبك خير

واوعى تعيطى يا فاتيما

افرحى

والله يا طمطم الفرحه من حقك....احمدى ربنا على قد مااااتقدرى

اللى ربنا يرضى عليه يحبب فيه خلقه..وانت بقى ماشاء الله

عيشى

ربنا ادالك نعمة الحياه...

"وان شكرتم لأزيدنكم "

اطلعى من القمقم و صدقينى حتقابلى اللى انت بتدورى عليه..

لونى قلب حزاينى ليه كده

دا انا فرحانه اوى ى ى ى ى ى

دا انا قابلت فاتيما يا منزززززززززززززز

بشر!!!!

بشر!!

انا شفت بنت بيضا حلوه وزى القمر

--

والابتسامه بغمازات يا سلام شىء معتبر

--

لله فى خلقه شؤن ولابن آدم عِبر

--

فضلت امدح واقول دى ملاك والا بشر

--

لما نطق الملاك لقيته حدِف حجر

--

قلت الكمال لله ومفيش ملاك كفر

--

والرمى بالحجر طبع البشر

--

وعجبى

هو ده الحل؟؟؟

من بعد اخر بوست حاسه انى مريضه...

لو ضرس بيوجعنى كنت خلعته..

لو صباعى اللى بيوجعنى كنت قطعته..

لكن لما بلدى توجعنى اعمل ايه؟؟؟؟؟؟؟؟؟؟؟

اول طلعه جويه=رئيس المصريين

موافقه

تمر السنيين ويظل رئيسا

موافقه

نعم نعم من جوه القلب

موافقه

كلاكيت تانى وتالت نعم نعم بنقولها بحب

موافقه

سينا رجعت كامله لينا

موافقه

توشكى انجح مشروع فى هذا القرن

موافقه

التوريث التوريث

موافقه

تصدير الغاز للبعدا

موافقه

فساد وغلا

موافقه

المصرى حيفضل مصرى النيل رواه والخير جواه

اعترررررررض

اعترض ان تكون جنسيتى المصريه وصمه

اعترض على انتمائى لحزب 80 مليون شيطان اخرس

اعترض ان يكون الحل الوحيد الباقى..ان اترك واغادر ..اتنصل من جنسيتى

اعترض ان يصادر حتى هذا الحل !!!!!!!

شجرةٌ انا فى ارض مصر جذورى..

فهل اعيش اذا ما اجتثت الساقٌ؟؟؟؟؟؟؟

المصريين وافقوا لما سكتوا

والمثل قال السكوت علامة الرضا

ملحوظه:موافقه بالاحمر لانها ختم رسمى...وبالبنط العريض لانها على القفا المصرى اللى ورم

آااااه يانى

كعادتى كل يوم اول ما بصحى..بفتح بلوج مى(نص دستة افكار)اطمن كتبت اييه؟؟ الكومنتات على كتاباتها اخبارها
ا يه؟؟؟؟
من عند مى (البواب بتاع العالم السحرى)انطلق
ادخل مدونتى من اللينك اللى عند مى وادخل عند فاتيما برضه من عند مى وانطلق بقى زى المشفوطه من بلوج لبلوج من تعليقات البلوجاويه
اتشفط النهارده عند واحده مصريه عايشه فى المانياالبلوج بتاعها فيه يوتيوب مكتوب فوقه كلام عن مصر
فتحت الفيديو عنيه دمعت..الصور فتحت جرح قى قلبى وقلوب المصريين

رغم انفي بحبك يا مصر

http://kamility.blogspot.com/

دى البلوج اللى فيها اليوتيوب

بحييكى مع انك وجعتينى

-----------------------

رجعت لجوباتى..اللى كتبتهم لصاحبتى وطلعت صرختى و...آه

اااه يانى

اصحى من النوم والا انام تانى؟؟؟ دى كل حاجه فيه واجعانى

راسى ورجلى وعينى وسنانى وودنى من الوجع مبقتش سمعانى

من اللى شفته فيكى عنيه مش مطوعانى..

لا عايزه ولا قادره تشوف تانى

ومهما اهرب اخبارك محوطانى... بلدى واروح فين منها يا زمانى؟؟؟

السوس فى اساسك بينخر والا بينخر فى عضامى؟؟؟؟

بلدى وامى وحبيبتى فيكى طفولتى وشبابى..

بس الشيبه قالقانى

خايفه عليكى اوى فين البهيه ام طرحه وجلابيه؟؟

بدور على الخير والسنابل اللى اتنهبوا قدام عنيه

حتى ارضى.. اللى كنت فكراها سندى من سنييين كانت بتدى..خير مشبع كل ِولدى

سامعه كلمه عمروها!!! وكمان صحرا خضروها؟؟؟

كل ده كلام اغانى.... او امانى ف كوكب تانى

الحقيقه ...دول باعوكى قسموكى وخصخكوكى..وبايديهم بوروكى

حتى ولدك اللى تعبتى فيه .. اللى هاجر ..غلطوه واللى صبر ..فى طابور العيش موتوه

ولدك المصرى كريم العنصرين!! جوعوه ونهبوا حقه من سنين

واللى ضعف فى الولاد عن وعيه غيبوه ابنك الغالى خدروه ومن كل الجهات حاصروه

بانجو ماكس.. ويا عالم ايه تانى والا اللى شافه فى قنوات الاغانى

صرخ من اللى شافه وحاله بكانى حاولت اعٌلى صوتى ..ولا ودن سمعانى

همست فى ودن امى واشتكيت من كل حاكم ظالم انانى

لقيت امى بتلطم وتسد بقى بايدها خايفه من البهدله وزمن المعتقلات اللى رجع تانى

معدش فيه اللى يسمع الشكوى؟؟ !!!!

رفعت ايدى للسما وللى يقدر على القدره اشتكيت وبكيت

يا رب لما دقيت بيبان غير بابك اتذليت يا رب خلى بلدى وخليلى فيها اهل وبيت

. ويفضل سؤالى من غير رد... اصحى والا انام تانى..

يا بلدى سمعانى؟؟؟

--------------------

فى اخر الجواب مكتوب

الى مستلمه الرساله الباسله
اللى لسه مستحمله انا لا سياسيه ولا ليا فى السياسه
وده مش لسانى ده لسان حالى...بجد مصر وجعانى

وآااه يانى