جميله..
اول صرخه ليها فى الدنيا ..فى يوم العيد
جميله ..
امها سمتها "جميله" والاسم على مسمى..
احلى واحده فى الشارع كانت هى..
فى الحى برضه هى..فى بلدها برضه هى....
مع البنات تلعب وفى وسطهم ورده...
كل اللى حواليها حبوها ..
امها كانت احسن ست فى جيرانها
طيبه وحنيه..
حكمه وذكاء ودينها كان يزينها
ست ولا كل الستات..
وربنا رزقها بجميله وبس..
مرت الايام وكبرت البنت..
امها علمتها كل خير..
كتروا الخطاب ..والام يحكمتها ترفض اللى مينفعش
لحد ما جه هو..
راجل يملى العين
ويتصف بكل اللى تتمناه الام لبنتها..
بيتها كان فى مصر مش فى بلدها...
اتجوزت وكانت احلى عروسه فى فرحها...
الايام تمر والكل مستنى يبارك ويهنى..
لكن جميله ربنا مكتبش انها تنجب!!!
ولا حد عارف ليه ولا من مين السبب؟؟
فى يوم جوزها زعلها ..بس زعله كبيره
نزلت من بيتها ركبت اول قطر على طنطا...
ولما نزلت من غير اسباب راحت على السيد البدوى...
لا عمرها راحت قبل كده ولا حاجه..
بس ساعة القدر!!!
دخلت وصلت ركعتين ..
وف ركن قعدت تتفرج على اللى رايحين وجايين..
واللى يشوف وشها يعرف ان قلبها حزين
سرحانه فى الملكوت ..
جنبها قعدت ست عجوزه شكلها من الفلاحين..
وشايله طفل..شكله مولود من يومين..
بيعيط بحرقه ولا راضى يسكت لحظه!!
صعب على جميله وقالت للست هاتيه اشيله عنك..
اول ما خدته جميله فى حضنها ..سكت الولد
قالت العجوزه ..تلاقيه فاكرك امه.. الله يرحمها
هى امه ماتت..قالت جميله بحزن؟؟
الست قالت وابوه كمان..
حست جميله بخوف والم ..
مسكين ابن يومين ..ويتيم!!
الست استأذنت تروح تتوضى فى الميضه
وخلى ابراهيم معاكى لحد ما ارجع...
راحت الست وغابت ...
مرجعتش!!
وجميله قاعده تستنى..
ولما طال الوقت راحت تدور
ولا لقت للست اى اثر...
يتبع
هناك 23 تعليقًا:
ينفع كده ؟؟
تحكى نص الحدوته وتروحى ؟؟
برضى مين ده
يا سلام
طيب كملى بسرعه بقى عاوزين نعرف ايع الى حصل
دمتى بخير
يا الله
ربك فعلا بيدي كل واحد نصيبه
بس المشكله الوحيده هنا انك قلتي راحت للسيد البدوي
معتقدات عايشين فيها نفسي تتغير كمان
غير الرضا بالنصيب والقدر
تحياتي يا دوددا
مستنيه الباقي
قصتك جميله ومستنيين باقى الحدوته .. بس فعلا اتفق مع لماضه فى حكايه السيد البدوى دى ...دى موروثات لابد ان نتخلص منها
فقد قال المولى عز وجل (اينما تولون فثم وجه الله )
شكرا على مرورك الجميل وارجو دوام التواصل
شوقتينا
مستنى الباقى فكره تداخل جميله ياريت الباقى يكون حلو كده
طيب لو شفتك الجمعه تكملى باقى الحكايه واجيب لكي كريز ايه رايك على التشجيع ده
حلو اوى اسلوبك فى السرد مستنينك ياشهرزاد عارفه انتى خلتينى اقول يارب العجوزه ماترجعش ها يالا كملى مستنينك
الله على الجمال لكن فين الجزء الثانى راح فين
نحن فى إنتظار الجزء الثانى
أتمنى منكم زيارة مدونتى على الرابط التالى :
http://alooloa.blogspot.com/
ويارب تنال رضاكم
السلام عليكم ورحمة الله وبركاته
أشكرك على زيارتك لمدونتى العزيزة
وأنا متفق معكى فى رأيك بأننا ا نستحق ان حصل على حقنا الآن نظرا لضعف العرب وتفككهم.
أنا فى إنتظار الجزء الثانى من القصيدةالتى أبكتنى .
تحيات اللؤلؤة
حبيبتي كفاية كدة...شوقتينا وكل الجماهير تطالب بباقي الحكاية !
على فكرة الفيديو عندي مش شغال الظاهر فيه فيروس على جهازي
السلام عليكم
يمكن يكون حلم يمكن يكون علم
منتظر اعرف باقى الحكايه
واعرف حكاية جميله اللى بسردك لها اصبحت فعلا حكايه جميله
تحياتى
ومنتظر تكمله
ان شاء الله
طب ماشي
هنستنى
طريقتك مشوقة اصلا
تحياتي
ياعيني عليك يا ابراهيم
يا ترى ايه اللي هايحصل ؟؟؟
والسلااااااااااااام ختاااااااااام
حلو ده انا معجب بالمدونه دى اول زياره
hmmmmm
جميله وربنا رزقها بجميل
بس خلوا بالكوا الموضوع مالوش علاثه بالسيد البدوى..
regards
hussein
طب أنا حستني بقية الحكاية
مدونتك لذيذة بجد
تحياتي
كويس ان الموضوع دخل فى ناحية تانية مالهاش علاقة بالولى والكلام ده
بس ابراهيم ده هيطلع ايه بقا ياترى
لما نشوف
تحياتى
اين بقيت القصة
شكلها حلو ومثير
منتظرة هنا البقية
لا حول ولا قوة الا بالله ..
بانتظار التتمة :)
إلى الأمام دائما :)
انا لو منها ارمي العيل واطلع اجري
لا بجد طريقتك متعه في الحكي
تحياتي
صراحه قصة جميلة
وطريقة عرض جميلة
وفيها افكار جميلة
قد اعترض علي الفكره التقليدية الخاطئة التي تخص الاولياء
ولكن انتي ذهبتي للصلاة فقط لله
وليس دعاء للبدوي
ننتظر الباقي
إرسال تعليق