2008/04/24

جوابات

هى فكره والا اكتر؟؟
من فتره كده جاتلى فكره انى اكتب لصاحبتى جوابات!!
لاسباب مرفقة طيه واحلى حاجه اكتشفتها بعد ما بدأت ابعت الجوابات..ان الجواب شىء جميل ممكن الاحتفاظ به وده يعنى يفضل ذكرى تفكرنا بحاله وظرف وبينا ..فى وقت كتابه الجواب كانت خبراتنا ايه ..يعنى لقيت ان كتابه الجوا بات تشجع احد عاداتى التى لا استطيع تفسيرها وهى الاحتفاظ باشياء لتذكرنى باشياء ..تسمى فى الاول تذكارات ثم تتحول الى كراكيب من وجهه نظر المحيطين!!
ولكنى كنت ولا زلت احب اشيائى الروبابيكيااااااااااااااا
اول جواب
نسيت اخد العنوان عشان ابعت الجواب كمان مش عارفه منين اجيب طابع بوسطه!!ولا فين الصندوق!!!!

قررت اكتب هنا عشان يبقى اسمى بدأت سلسله من الجوابات لصاحبتى...اللى انا وهى عايشين فى نفس المدينه!!وعندنا تليفونات ارضيه وموبيلات وايميلات ولابتوبات.....والتعلب فات فات.
ليه؟؟؟
لانى دايما عندى حنين لزمان وكل الحاجات الحلوه بتاعت ايام زمان اللى عشناها وشفناها واللى بس سمعنا عنها واتخيلناها
حجات حلوه كلها خير وبركه ومليانه فرح ومشاركه..... احلى اوقات واحنا صغيرين وطول الوقت مع الجدات الله يرحم الجدات.....
سبب تانى ان ربنا اكرمنى بحاجات ..وطبعا اتباعا لقوله" واما بنعمه ربك فحدث" لازم اقول
اول نعمه والحمد لله عليها وعلى انى مدركه ان ربنا اكرمنى بيها هى "عقلى" ناس كتير اوى ناسيه النعمه دى ..بس انا الحمد لله فاكرها واكيد حتكلم عنها كتير
وكمان ربنا اكرمنى بصاحبتى اللى حبعتلها الجوابات اللى هى عندى غاليه اوى وقريبه اوى اوى من غير ما تعرف...ودى من اكبر النعم ..مش سهل نلاقى حد فى الزمن ده نرتحله ونطمن له ونتواءم معاه ويمكن كمان نتتوءم معاه
وده كمان كتير حتكلم عليه حكم انا رغايه!!!
والسبب التالت وحعتبره موضوع الجواب..ان لعنه الله على الكى بورد!!!
طول عمرنا نروح مدارس ويطلع عينا صحيان بدرى وسندوتشات...وجرس وشرابات!!!تفانين فى تعذيب الاطفال وطبعا حدث ولا حرج عن الواجبات واللا نسيتوا الواجبات
درس القرأه كان بيتكتب كام مره؟؟؟؟
واللا الشنطه اللى جابت لنا أتب!!!!!
وقلم جاف وقلم رصاص ..استيكه وبرايه وباقى الادوات.....كل ده بجرة كى بورد لاغيناه ونسيناه؟؟؟
فين ايام ما كان القلم سلاح
الله يمسيك بالخير انت وقلمك الرصاص ياعم حمدى قنديل.. والمسا طبعا مدام نجلاء
انا بلعن اختراع الكى بورد ده حيجيبلنا اعاقه وايدينا حتصدى... بجد بجد حننسى حاجه اسمها نكتب بالقلم
ولو ايدك فقدت مهارتها فى الكتابه حتبقى اضعف فى حاجات تانيه كتير اوى.....
--------------------------------------------------------
ملحوظه:كل جواب مذيل بكلمه موجهه خصوصى لصاحبتى
تحيه منى لمستقبله الجواب
ابعتيلى العنوان بسرعه ولكى الشكر من اعماق يداى

هناك 10 تعليقات:

صوت من مصر يقول...

اول كومنت تانى حاجه هو لسه حد بيتعامل بالجوابات والبريد فى الزمن ده

Unknown يقول...

اهلا بيكي في عالم المدونات ..
تعرفي .. احلى حاجة عجبتني في الموضوع ايه ؟ .. ان الجوابات هى احلى حاجة من الزمن القديم .. حاجة حقيقية وحميمية.. فيه لمسة فن وحنان ورحمة .. الخط البشري والورق الملون .. مش عالم الكمبيوتر والايميل اللي كله شبه بعضه .. خطوطه واضحة ومحددة والوانة محايدة وباردة .. اسلوبك جميل .. استمري.
على فكرة انا دخلت عندك من مدونة مي ونص ستة افكارها ..ربنا يخليكم لبعض

dodda يقول...

حسام ابراهيم...نورتنى
وربنا يخليك الحمد لله ان فى حد زيى بيحن للورق الملون والقلم وخط اليد
يا ريت تزورنى كتير تعليق ثرى واضافه اشكرك عليها

fawest يقول...

طبعا من غير كلام ولا رغى فى جوابات
وعشان وصايه مى و أفكارها المدهشه
وعشان أكتر من كده، تلقائيتك الجميله

بقول ياريت تقبلينى زائر دائم لمدونتك

بس خلى بالك من التنسيق والخط و حاولى تختارى شكل تانى (غير التقليدى) للمدونه و فيه مواقع كتير بدقدم أشكال حلوه
سلام يا جميل

غير معرف يقول...

fawest
ميرسى على مرور الكرام
ولما تكرر الزياره حكون ظبت الحاجات اللى انت بتتكلم عنها..ولو ان القيمه فى المحتوى بس ححسن خطى:)

غير معرف يقول...

صوت من مصر..
يادى النور انا دخلت عندك..مدونتك لذيذه وكلها تحابيش
مرورك ولا عسكرى المرور
وان شالله دايما الاول ربنا يعللى مراتبك وتيقى ظايط وتشيلنا المخالفات

عين فى الجنة يقول...

جوابات تانى :)))

دى ثقافة مختلفة والمعروف فى الغرب ان الخطابات بتشكل قيمة ادبية وتباع باغلى الاسعار فى المزادات خصوصا لوكانت متبادلة بين ناس مشاهير
ويارب تبقى مشهورة والناس تشترى خطاباتك وكل انتاجك ، وانا اتوقع لكى مستقبل باهر فى هذا المجال بشرط الاستمرار والتحسين

مبروك علينا صديقة جديدة فى عالم التدوين بتاع الخواجة جوجل

تحية طيبة

dodda يقول...

الياشمهندز راجى شخصيا....
يادى النور يادى النور
والله فرحانه بمداخلتك ولا العيد بتاع الكحك..اتمنى انى اكون عند حسن الظن
مش مهم الشهره المهم راحة البال
وربنا يديم المعروف

ابو حنين يقول...

الناس الى عندهم احساس مرهف هما بس الى يستمتعوا باستخدام الورقة والقلم علشان كدة انتى متميزة
ارق امنياتى بالتفوق والستر

dodda يقول...

ابو حنين

اعرف ان التميز يأتينى ليس مناحساس مرهف
انما من اناس يضعهم الله فى طريقى
الهم بارك فيك وفى حنين

وربنا يخليك
اسعدنى تعليقك بشكل غير عادى
ارجو مداومه التواصل