devoir>>homework >>>>واااجب

لما كوين فاتيما تقرر تلبس برنسيس دوددا تاج

يبقى لا مفررر

برنسيس دوودا لازم اسمع الكلام او تبقى ادب يوك اخلاق يوك!!!!

تااااج الاحلام.....

أذكر 5أحلام تخص ماضيك
كنت هتتخلى عن إيه فيها و هتتمسك بإيه لحد دلوقتى

اول حلم ان يكون عندى اخت بنت...

وده فشلت فيه تماما لان مامتى كانت اصلا مش عابزه بيبيهات بعد اخواتى الاتنين لدرجة ان ربنا يسامحها بقى كانت بتحاول تتخلص من الحمل...

فطبعا الحلم ده كان مرفوض مرفوض مرفوووووض

كنت بحلم اتجوز واحد كريم الخلق انسان متحضر ومتوافق معايا ومكنتش مستعجله على الجواز خالص

كنت دايما بدعى فى صلاة القيام يا رب لو مكتوبلى اتجوز يبقى زوج يرضيك عنى....

ولله الحمد ربنا اكرمنى ولم يخذلنى ابدا..فزوجى ولو ان شهادتى فيه مجروحه فاق كل احلامى ولا يكفى ابدا ان احمد الله كل لحظه كرمه معى فى اختيار الزوج

كان ليه امنيه غريبه جدا ..كنت دايما افكر فى انى افقد النطق وكذا مره عملت مقلب فى ناس ميعرفونيش انى بكماء

والمشكله ان الناس كانت بتتعلق بيا جدا وتحاول تتواصل معايا اوى ويتصدموا جدا لما يعرفوا انى طبيعيه وبتكلم وارغى

يقولولى حرام عليكى ..بس انا كنت صغيره

والحمد لله دلوقتى بقيت بتواصل مع كل ذوى لاحتياجات الخاصه

بطبيعة دراستى..وبتكلم شويه بلغة الاشاره

كنت بحلم ان يبقى ليا اصحاب كتير.. يحبونى واحبهم تعويضا عن الاخت بس للاسف مع نظام بيتنا منفعش لان ماما كانت مقفلاها عليه اوى..

ربنا اكرمنى بصحبات قليلين جدا بس مش صحوبيه والسلام

الحمد لله

كنت بحلم ان بابا الله يرحمه يفضل موجود معايا..كان نفسى اتعلم منه حاجات كتير اوى

بفرح اوى لما اتصرف بطريقه واكتشف ان ليه اثر فى تصرفى ده

بس لكل اجلِ كتاب .. ربنا كتب عمره كده وانا الحمد لله دايما راضيه بقضاء الله

------------------------------------------------

أذكر خمس أحلام تخص مستقبلك و ما تتمناه منه

اول حاجه بتمناها..ان ربنا كتبلى اعمل عمره الشهر الجاى ده

ربنا ييسرها من عنده..واللى عنده اى معلومه تفيدنى ازاى اطلع عمره بسرعه ومع شركه كويسه يقول وله الثواب

حلم حياتى اللى عندى يقين ان ربنا مش حيخيب املى فيه انى اجيب ولد اسميه يحي لانى بحب سورة مريم ودايما بتأثر بقول الله تعالى

"يا يَحْيَى خُذِ الْكِتَابَ بِقُوَّةٍ وَآتَيْنَاهُ الْحُكْمَ صَبِيًّا (12)
وَحَنَانًا مِّن لَّدُنَّا وَزَكَاةً وَكَانَ تَقِيًّا (13)
وَبَرًّا بِوَالِدَيْهِ وَلَمْ يَكُن جَبَّارًا عَصِيًّا (14)
وَسَلَامٌ عَلَيْهِ يَوْمَ وُلِدَ وَيَوْمَ يَمُوتُ وَيَوْمَ يُبْعَثُ حَيًّا "صدق الله العظيم

يا رب ترزقنى بيه وتلهمنى فى تربيته باللى يرضيك عنى وتجعله تذكرة دخولى انا وباباه الجنه امين

بحلم ان حال بلدى ينصلح ويرجع الخير والزراعه والناس تشبع وتعيش مستوره وسعيده

وكل الناس نبقى راضيه ومبسوطه...الابتسامه الحلوه.. الرضا بالحال وشكر النعمه يبقى فى كل القلوب

بتمنى ان ربنا يستخدمنى ..واكون نافعه للاسلام والمسلمين

وبرضاه على يرزقنى حسن الخاتمه مرافقة الرسول فى الجنه وينعم على برؤيه وجهه الكريم سبحانه وتعالى

اللهم امين

وحلم دنيوى شويه بي من زمان بيراودنى..انى اكون حازمه شويه واخس عشره كيلو!!!

ده بقى حلم عارفه ان اخرته هأأأوووو :O(

----------------------------

أذكر شخصين - على الأقل - متواجدين فى حياتك كنت تتمنى وجودهم من قبل

اول شخص بجد كان نفسى تكون صحبتى من زماااان اوى "مى"

بحس ان تأثيرنا على بعض حلو ولوكان من بدرى شويتين كان حيفرق كتير اوى معانا احنا الاتنين

بس ملحوقه والحمد لله ان ربنا وفقنا لبعض

هو مش واحد دول اتنين..

الدكتور عمر عبد الكافى..والشيخ حازم ابو اسماعيل

ربنا يكرمهم ويبارك فى عمرهم ويديهم الصحه...

حسيت منهم" قلب الدين" ومسمعتش منهم ابدا كلام غير مقنع

ربنا يجعله فى ميزان حسناتهم...

خصوصا الدكتور عمر عبد الكافى.. اللى عايز يوصل للايمان مش بس يبقى مسلم يسمع دروسه

وفيه واحده بقى مش حتكلم عنها كتير عشان لازم اعملها بوست لوحدها"حماتى"

--------------------

أذكر شخصين - على الأقل - غير متواجدين فى حياتك و تتمنى وجودهم مستقبلا فى حياتك و حياة أولادك

طبعا بابا الله يرحمه كان نفسى يشوفنى وانا عروسه ويشوف ولادى ان شاء الله موعدنا الجنه

وجدتى نفس الكلام ..

الشخص اللى نفسى اشوفه بقى ويشوف ولادى لما يجوا ان شاء الله..عمر اخويا ربنا يهديه ويديله الصحه

هو فى امريكا من كذا سنه وحشنى اوى

ولو مجاش انا حاضطر اخد العيال بقى واروحله!!!

اومال مين يعلمهم اللماضه والشقاوه؟؟؟

اخيرا لمن تهدى التاج

طبعا مى بهاء ..واى خدمه يعنى ابقى برنسيس لوحدى؟؟

ملك الملوك ابو عمر الصغنطوط king toot

سنوهى..كتباته بتعجبنى

مادو قلب الحياه...مش اى قلب

مصطفى محمد..لان من السخافه ان امتنع..سأكتب...لاااازم يكتب

بيتنا القديم..الخير كله فى البيت القديم

واطيب عرضحالجى فى الحى البلوجرى

-----------

انا عملت الواجب يا فاتيما حتدينى ستار واكسلنت؟؟؟