2009/02/23

يوم فى الحسين..


مش عارفه قلبى كان حاسس والا ايه؟؟؟؟!!!

انا قضيت اليوم النهارده فى الحسين!!!
لا جديد تحت الشمس...


اول ما رحت كان كلى عيون مستنيه اشوف اى اثار للموضوع اللى حصل امبارح وسألت الناس اللى كانوا فاتحين المحالات فى خان الخليلى.. ضحكوا !!! لان الموضوع لا يتعدى كونه "بمبه"

حاجه لعب عيال
انا شخصيا كنت زمااااااان بعملها بعلبه صفيح وافضى فيها محتويات كيس من البمب وارميها فى الشارع فى رمضان ساعة المدفع
وكان اللى بيحصل لا يمكن ان يوصف بأقل من انفجااار
اللى حصل فى الحسين مش ازيد من كده...

طب الست ماتت ازااااااى؟؟؟؟؟
لعب العيال قلب بجد فحدث ما لا يحمد عقباه
ال"بمبه"
فرقعت ع الارض والناس كانوا قاعدين ع الرصيف حجر الرصيف اللى اتكسر نزل عليها قضاء وقدر.. حتى اذا جت csi حيقولوا كده والاصابات اللى قالوا عليها طفيفه شوية خرابيش.....

المكان مليان عساكر بشكل مضحك
وفيه سياح عدد معقول زى العادى من اول السنه مش خايفيين ومرعوبين
بس مبحلقين فى الكاميرات اللى بتصور طول النهار "ولا حاجه" ايه القناوات اللى ماصدقت دى؟؟
ومبحلقين اكتر فى العمال اللى بيصلحوا الرصيف مع ان اللى حصل فيه كان صعب تلاحظه الا اذا دققت اوى...


بالذمه مش حاجه تكسف؟؟؟
مصر تهتز بهذه القوه...
من اجل" بمبه"!!!!!!!!!!!!!!!!!!!!!!!!!!!!!!!!!!



هناك 46 تعليقًا:

احساس لسه حى يقول...

عزيزتى

اكيد مش شئ بسيط لان مات حد فيها

والمشكله مش فى الحادث نفسه

الخوف دايمن احسن يكون سلسله من الحوادث

لان اللى بيبتدى فى شئ بيكون عاوز يوصل لشئ

انا صححت الخبر اللى علقتى عليه عند ايمى
بتعليقين

لازم لما نكتب خبر او نعلق على اى خبر نتاكد من صحته علشان منظلمش حد ولا بلد لاننا مش بنرضى حد يطلمنا ولا يقول خبر كذب على بلادنا

تحياتى

سلام

الفقيرة إلى الله أم البنات يقول...

دودا
لما يكون المكان زى قالب السكر اللى عايم
على ميه
اول ما تلمسيه يحصل إيه؟؟
يتفتت
وهى بايشه قوى ..وخاويه
نسأل الله ان يردها لنا رد جميل
ويحصل لها كده من فرقعة لبانه بيمضغها عيل

حبيبتى
ربنا يستر من اللى جاى

Unknown يقول...

حسبى الله و نعم الوكيل فيمن يفعلوا ذلك
ربنا يحمى البلد
ديه

بس اللى عايز اعرفه الأمن كان فين
بالضبط
مش فاضى غير لمتوشة الكورة و الإضرابات
و الإعتصامات و بس

غير معرف يقول...

ربنا يكرمك ان نزلتى علشان تشوفى توابع الموقف بنفسك
خطوه جيله حتى اذا ماكانش فى حاجه

dido يقول...

السلام عليكم
والله انا شايفه اننا ندي الموضوع حقه يعني ولا نكبره اوي ولا تفه منه
الست اللي ماتت دي بردو روح وماتت الله يرحمها بردو بس الموضوع مش كبير اوي يعني يمكن كبر اوي كده علشان المكان سياحي وعليه العين مش اكتر

إيمان يقول...

أولا : تدوينه تحفه تحفه موضوع مهم جدا وحركه جريئه منك ..ومتميزه
ربنا يكرمك
كنت فعلا عايزه أتطمن على الحسين
ثانيا: الموضوع فرقعة إعلام مش اكتر
ميخوصش مصر ولا إهمالها المرادى مصر براءه
الإعلام بيعمل كده فى كل دول العالم
ثالثا: إتشليت لحد معلقت عندك
من يوم معرفتك وأنا عجبانى مواضيعك
وعاجبنى إسم مدونتك .. ومعجبه بشخصيتك القويه المعمليه الفزه ..وأنا مش عارفه أكتب تعليق وفضل تعليقى متعلق
ربنا يوفقك ..وأشوفك أشهر مراسله صحفيه فيكى يا بلد
تحياتى

Che_wildwing يقول...

الموضوع ده ريحته مش كويسة
ومحدش فاهم حاجة

قوس قزح يقول...

يعنى ايه بمبة ؟
طيب و بدام هى بمبة و الاصابات شوية خرابيش
اومال الصورة اللى الدم فيها مغرق الارض دى ايه ؟
كل ده من ست واحدة ماتت بحجر ؟

فى حاجة مش مفهومة

رئيس جمهوريه نفسى يقول...

المشكلة مش في البمبة المشكلة فى تبعات البمبة واولهم قانون الارهاب او تمديد قانون الطؤارى لمزيد من التحصينات والدفعات حول هدف التوريث اللعين

الـسـيـدة نـون يقول...

ازيك يا دودا

انتى كنتى بعتيلى ايميل بخصوص
تعلم النحت

انا معنديش مانع وممكن نشع بعض ونتعلم سوا

بس الفكرة ان انا لو اتعلمت الموضوع ده
مش هيكون غير فى الصيف لما شريف يخلص وياخد الاجازة


لو تعرفى اى معلومات عن اسعار الكورسات
بلغينى بيها


شكرا على اهتمامك


بقى فى الاخر طلع الموضوع بمبة

نيهاهاهاهاهاهاهاهاهاهاهاع


عالم خيخة بصحيح يعنى




سلام
اختك خيخة

Ehab يقول...

اذن ومن وموقعي هذا اعلن اني عرفت مين اللي فيقع البمبه
وباعترافك وشهادة الشهود
وبكلماتك انتي مش حد تاني
وبدون اي ضغوط ماديه او نفسيه او جسديه عليكي
اعترفتي بكامل ارادتك انك انتي خبيره في تصنيع البمبه
وانك صنعتيها قبل كده
وعلى ذلك وبما توفر لدينا من ادله
وقناعة هيئة المحكمه بالأدله التي قدمتها النيابه
تقرر الأتي

القبض الفوري على حضرتك
ومنعك من السفر خارج البلاد
مصادرة جميع صفايح السمنه اللي عندك في البيت
وياريت لو في بيض تجيبيه علشان نقليه في السمنه
ومصادرة جميع البمب اللي مخبياه عندك في الشقه
اجبارك على التعاون مع النيابه لتحديد الراجل اللي في العتبه اللي بتشتري منه البمب الفزيع ده

خامسا مش فاكر خامسا دلوقتي هابقى اقولهالك بعدين
تحياتي
سلااااااااااااااااااااااااام

اسماء عوني يقول...

عادي يعني الدنيا مليانه بمب

*البت المشمشية *حلوة بس شقية * يقول...

ايه النظام
وبعدين
اخرتها ايه

Ahmed يقول...

انا عن نفسي بكره البمب جدا

بس البمبه ديه مهمه لأنها فكرتنا أد ايه احنا بنحب البلد ديه

اعشق فى الليل ضوء القمر يقول...

شكلك كده مش عايزه تجبيها لبر
لو إتاخذتى مليش دعوه
ههههههه
على فكره أنا بقلك إبعدى على الواد إللى إسمه أعشق فى الليل ضوء القمر
هتتبهدلى معاه نصيحه أخويه وانت حره

snohe يقول...

صديقتى العزيزه
انا من عشاق خان الخليلي وقهوة الفيشاوى والمحلات الجميله ورائحة البخور والعطاره
مش ممكن حد يزور
حى الحسين ولا ينبهر بروعة المكان العبقرى
والله الناس هتزور المكان اكتر من الاول

تحياتى

KHALED يقول...

إعلام مش لاقى حاجة يعملها مفيدة

صوت من مصر يقول...

بجد هايل لان نفس تفكيرى فى الموضوع انه فعلا بمبه او صاروح
لكن هنعمل ايه انا مثلا فى شارع الهرم احلف انى شوفت اكتر من 150 بوكس على عربيه اسعاف
بجد نحن شعب ساذج مع حكومه متخلفه

محمد الدخاخنى يقول...

فى أحد البرامج أعجبنى تعليق احد الإعلامين على الموضوع حيث قال"حيطلع حاجة من اتنين ياللى عمل كده واحد مختل عقلياً يااما عيل صغير..!"

تحياتى،،

محمد عتلم يقول...

هيا بمبه بس بمبه غاليه شويه
اصل فيه بمبه بشلن الواحده وفيه بمبه كبيره ببريزه وفيه البمب المستورد مش المصري هوا يمكن مش موجود فى مصر بس ممكن الواحد يدخل بمبتين تلانه معاه فى الشنطه وتقدر تجيب البمبه دى بمعدل جنيه ونص للبمبه الواحده
اى خدمه

thunder يقول...

المشكلة مش فى البومبة المشكلة فى تاثيره واللى حاصل واللى لسة هيحصل طبعا الكل عارف ان شرم بتسرح عاملة والمصانع فى العاشر و6 اكتوبر بتمشى عاملة بعد الحادث بقة مين هيتسنى هى دى المشكلة التاثير على الرغم ان مصر اهتزت بس الاهتزاز مش على قدر الانفجار الاهتزاز المفروض على تاثيرة معاك حق احنا يمكن الغريبة نشرنا عساكر كتير بس اية الداع موقف فردى واكيد مش هيتكرر تانى الموقف فى الموجه الاقتصادية واللى بسلمتهم طلعوا علينا وبيقولو ان لكل مواطن عشرة جنية فى مواجهة الازمة الاقتصادية العالمية اى والله 10 جنيهة اللى دلوقتى كانها بتساوى بزبط بريزة ومعدلهاش قيمة
على العموم ربنا يستر فى اللى جاى
دمتى بكل ود وخير

فشكووول يقول...

العزيزه دودا.. تحياتى
اللىحصل فى الحسين ده حاجه كدا لوغاريتمات وما حدش فاهم حاجه .. اصحاب الموضوع بس هما اللى فاهيمين
يا ترى ايه اللى عندك فى المطبخ النهارده ... لحمه ... الله الله الله
حته لحمه زياده عشان خاطرى
تحياتى

حاجات جوايا يقول...

والله بمبة
ولا انبوبة
ولا قنبلة
فى النهاية ده تصرف طائش وغير مسئول
ربنا يهديهم يارب

جزاكى الله خيرا على المتابعة حبيبتى
سالى

شمس النهار يقول...

والسائحه اللي ماتت دي
ولو كده فعلا ليه الاعلام ضخم الموضوع
والا زي مابيقولوا عشان موضوع قانون الطوارئ
بصراحه انا مش فاهمه حاجه

ريمان يقول...

ايه ده ايه ده


انتى بتكلمى جد؟


بوميه؟

بومبه؟


وعملوا كل ده عشان بومبه

يا سلااااااااااااااام

وقعدوا يقولوا انفجار و30 جريح ومش عارفه مين اللى مات

حاجه بجد تكسف

معاكى حق والله

ahmed_k يقول...

للأسف الموضوع تفجير بالفعل وبيحصل في كل الدنيا اعمال مشابهه
هو عمل بسيط لكنه اوقع قتيله وهناك مصابين
وطبعا علشان الخوف على السياحه طلعت حكاية البمب دي
يعني معقوله هما المن بيسيب حد يلعب ببمب جمب الماكن المتواجدين في السياح
ده من بدري مش ممكن يحصل
انا من الغردقه وبشوف لو عيل في العيد حب يلعب ببمب جمب مدخل اي قريه سياحيه بتوع المن بينهروه وعينهم بتكون عليه لحد ما يختفي
طبعا العالم ليس بالسذاجه ليصدق انه بمب عيال لكن تكبير الموضوع أكتر من حجمه برضو غلط
لأنها أفعال فرديه وخايبه بتحصل في أي مكان في الدنيا بس مصر عشان تحت المجهر بيظهر وتتضخم الأمور


خالص واطيب تحياتي

د. ياسر عمر عبد الفتاح يقول...

أنا فعلاً مستغرب جداً من التهويل المصاحب للحادث

ربنا يحفظ مصر وكل بلاد المسلمين من القرف ده

عمرو جويلى يقول...

السلام عليكم
الأخت دودة
الناس دى هتدمر البلد والبلد مش ناقصة مصايب
تحياتى

دعاء مواجهات يقول...

ههههههههههههههههههههه

ياستى مصر بلد الامن والامان

ادعوكى لزيارة

http://mhlpyaaa.blogspot.com/

بسمـــة مســـــلّم يقول...

اولا السلام عليكم بجد مبسوطة انى دخلت المدونة الجميلة دى وانا معاكى ان الموضوع بمبة والاعلام الف بمبة لاى خبر بس لو بصينا من جهة تانية حنلاقى السياحة انضربت وعليه العوض سلامى واكيد منتظرة تعليقك

بنوتة يقول...

السلام عليكم
عارفة هو في ناس كتيرة من مصلحتها صورة مصر تهتز
ده احتمال والتانى
هو لمصالح عليا داخلية
لاستمرار قانون الطوارئ عشان امريكا لما تيجى تضغط على الحكومة مطالبة برفع القانون يقولوا ليه ده البلد مش مستقرة
حاجة تحير وتزعل
ربنا يرحمنا
تحياتى ليكى

حسن ارابيسك يقول...

الحقيقة كل الشكر
على التغطية الجميلة دي وكشف الحقيقة
هما كده لما يحبوا يكبروا موضوع يكبروه
ولما يحبوا يداروا على موضوع يخسفوا بيه في سابع أرض
واضح انك مراسلة شاطرة
تحياتي
حسن أرابيسك

سحساوي يقول...

ربنا يحفظك و يحفظ مصر قولوا آمين
البلد دي بحبها موت موت موت

funckydoctor يقول...

هههه
فعلا هو موضوع ثغير بس معناه كبير
والمغزى منه للأسف مش كويس

آه وكفى يقول...

يابنتي احنا حكومة بمبة اصلا
صلي عالنبي
انا كمان كنت هناك النهارده .. وعادي كلو في الهجايص .. والسياح زي ميكونوا بيقولوا ما المصريين ماشيين اهو وعادي ومسلمين امرهم لله وزي الفل وكلنا ولاد تسعة

بعيداً عن البمبه .. لسه زعلانة؟

رحلتنا في الحياة يقول...

حتى لو محدش مات بس الفكرة عموما فى الخوف من ان فكرة الامان فى مصر دى بقيت حاجة من الخيال الانسان حتى لو عايش فى بيته بئا مش حاسس بالامان فيها

شخـا بيــط مـحـجـوب يقول...

تحياتى ليكى

اكيد اللى حصل مش كويس حتى ولو انة حاجة صغيرة
يكفى ان بض الناس متحسش بالامان
يعنى هو الحاجة تفهة طبعا بس يكفى الزعر اللى حصل

عموما خير

تحياتى ليكى

وتقبلى مرورى

شخابيط mahgoub

عين فى الجنة يقول...

انا ضد قتل الابرياء

سفروتة يقول...

زوبعة في فنجان
لاغماض العيون واسكات الافواه عن ما يحدث في العالم الخفي
سياسة متخطط ليها
واحنا الضحية

موناليزا يقول...

يعنى مش ارهاب ولا حاجة!
طب الحمد لله

صيدلانيه طالعه نازله يقول...

المشكله مش فى البومبه و البنت اللى ماتت المشكله فى اللى جاى بعد كده و الكساد اللى موجود اصلا بفعل الازمه الاقتصاديه
مصر اقتصادها منهار اصلا و مش مستحمله اللى يهف جنبها حتقع
ربنا يستر فعلا

Hossam يقول...

انا شايف انه مش بمبة خالص لان البمبمة مش تموت حد ولكن حسيت ان اللى فى الحسين بيوقلوا كده عشان يهدوا نفسهم مش اكتر
الموضوع بجد جميل اوى
وخدت بالى من حكاية الطفل البريطانى ده
وده مش حاجة كويسة خالص دى مصيبة انا على سنة دلوقتى المفروض ابقى جدو
تحياتى لك سلام

mado80 يقول...

بمبه
كل الهيصه دي علشان بمبه
المشكله ان فيه ناس قاعدين لمصر علي الواحده ربنا يستر

بقلك ايه انا قريت شويه من بوستاتك القديمه
عجبني اوي بوست كلنا بنحبها
طبعا لازم كلنا نحبها
امال ايه

تعرفي بتخنق من اي حد معفن هنا بيشتم في مصر وخصوصا خصوصا لو كان مصري
تصدقي ان فيه مصريين بتشتم في مصر هنا

المهم انا عاوز اقلك حجات كتير ومش عاوز اطول كفايه كده
:):)

كل التحيه ليكي يا دودا

simply me يقول...

مصر تهتز من اجل غير المصريين
السياح يعنى

الله...الوطن...أما نشوف يقول...

منطقة الحسين بالنسبة لي هي المكان اللي باصالح فيه نفي واعيد التعرف على الاشياء...ولو كره الكارهون!
نورتي مدنت بتعليقك و لا اخفيك ان الوجه الباسم ذا الغمازتين يخفي حيرة ودهشة واغتراب وتساؤلات اكثر من منهكة...لكن لتكن لي الحيرة ولك الابتسامة والغمازتان:) أراك في حفل التوقيع القادم باذن الله

غير معرف يقول...

هناك الكثير من المغالطات أخي الكريم في التسلسل ، فماهر الريس لم يستقل من إدارة التلفزيون و إنما طلب منه الإستقالة لإهمله و عدم قدرته على السير بالتلفزيون قدما ، كذلك فالأخ محمد الوحيدي لم يكن مسيرا لأعمال التلفزيون ، بل مستشارا لوزير الإعلام و مقرر اللجنة العليا للإعلام الفلسطيني ، و رئيس التلفزيون الموحد ، و هو من عين باسم أبو سمية نائبا لرئيس هيئة إذاعة و تلفزيون فلسطين ، ثم بعد إعفاء رضوان أبو عياش من منصبه ، قام الوحيدي بتعيين باسم أبو سمية رئيسا للهيئة و إحتفظ لنفسه بمنصب نائب رئيس الهيئة و رئيس التلفزيون ، إضافة إلى مهامه الأخرى ، أما محمد الداوودي فهو الذي جاء نتيجة إنقلاب هادئ ضد الوحيدي و هو بالفعل كان مدير العلاقات العامة و هو المسئول عن إنقطاع الإتصال بالإتحاد الأوروبي لتطوير التلفزيون وعن إنقطاع بث فلسطين إلى كندا و أستراليا و أمريكا و غيرها ، و هو الذي أدى إلى حالة التدهور و العشوائية التي ساعدت حماس و غيرها من إفتراس هذة المؤسسة المهمة ، في الوقت الذي حقق فيه الوحيدي معادلة متوازنة أرضت الجميع عندما أعلن عن تلفزيون فلسطين مؤسسة أهلية و فتح الشاشة لجميع اقوى بمن فيها حماس للتعبير و الرأي .. كلمة حق يجب أن تقال في زمن ضاع فيه الحق ، و الله شاهد .