الورد اللى فى الصوره ده جوزى جابهولى
"قل اعوذ برب الفلق"
(الله اكبر محدش يحسدنى)
اكيد دى حاجه مفرحه
الورد ده جه البيت هنا يوم الاربع 18 \2
كان كله براعم زى اللى فى الصوره الصغيره
الغريب ان الورد كان معاه كارت ضمان لمدة اسبوع!!
ومعاه كمان كيس قد بتاع الكاتشب كده فيه حاجه نحطها فى الميه
انا بالفعل حطيت السائل فى الميه وكانت المفاجئه
الورد سبحان الله فضل يفتح كل يوم بشكل غير عادى ودى حاجه مفرحه
وانا متابعاه بسعاده لا توصف..
لحد ما فتح97% منه
انا كنت مسافره رايحه لمامتى ماهنش عليه اسيبه..
شيلته على قلبى طول الطريق ده على اساس انه حيدبل وارميه هناك
ماشاء الله فضل تحفه زى ما هو.. ودى انا بسميها برضه حاجه مفرحه
وطبعا شيلته على قلبى وانا راجعه من السفر تانى..
والغريبه ان عدى عليه دلوقتى اسبوعين ولسه زى يجنن وتحفه
طول الاسبوعين دو ل جوزى كل ما يعدى من جنبى اقوله ميرسى عالورد ربنا يخليك ليه
كل يوم بمعدل 20- 30 مره او اكتر
وغالبا انا والورد بقينا الظاهره اللى هو بيتابعها...
انا اتنطط من الورد والتغيرات اللى بتحصله وهو يتفرج عليه وع الورد
ودى مجازاَ تعتبر حاجه مفرحه
النهارده عمل حاجه غاظتنى اوى
وانا بقوله ميرسى اوى..سألنى بكل براءه ع الورد؟؟؟
وده كان كفيل انى انسى الغيظ
وافتكر الورد الجميل اللى ممكن يكون تمنه مش كتير
الا انه فرحنى لمده اكتر من 15 يوم...فرحه بمليون جنيه
وكفايه ان جوزى ربنا يخليهولى ويبارك فيه هو اللى جابه
لو ان بعد كل الشكر اللى شكرتهوله اشك انه حيجيب ورد تانى
اللهم لك الحمد على كل حاجه مفرحه
هناك 30 تعليقًا:
اولا مبروك على الورد والاحساس لو استمر15 يوم شوفى زكره هتفض كام مليون سنة ربنا يديم عليكم الود ياارب والرحمة والسكينة دمتى بكل خير
يارب يباركلكم ويارب كل بلاد بيوت المسلمين يبقى كلها حب يارب
يارب يسعدكم يارب ومبروك على الورد وعلى الزوج اللى بيفهم فى الورد ياقمر
بجد شكرا ليكى جدا جدا على إنك نقلتى
التجربه الرائعه دى لينا
أى زوج ممكن يفرح زوجته
بأقل التكاليف الممكنه
أيام الخطوبه..كان جوزى لو خرجنا مع بعض
وإحنا فى الطريق يركن فاجأه
وينزل يشتريلى ورده حمرا
بجد رغم إنه دلوقتى بقه مشغول جدا
إلا إنى لسه فكراهاله جدا وبفرح لما أفتكر
بوستاتك مميزه جدا .. دايما بستنى جديدك
وكنت ناويه أغير لون المدونه إمبارح بس بعد ما شوفت الورد..رجعت فى كلامى
بجد ربنا يفرح قلبك علطول وتكون السعادة في أوقاتك زي الضيف التقيل .. بجد بشكرك جدااا على سطورك البسيطة العميقة وعلى نقلك لخبراتك الحياتية .. ربنا يديم عليكي العمق والسعادة ..
بس لي سؤال من فضلك برة موضوع التدوينة .. هو يعني إيه إخصائية تخاطب صدقيني ده مش سؤال فضولي .. ده سؤال يارب تكون إجابته اللي في بالي .. معرفش إزاي ممكن توضحلي رد السؤال ده ..
غاية احترامي
الى الغير معرف
اخصائى التخاظب متخصص فى مساعده من لديهم مشاكل فى النطق بجميع انواعه
وخاصة ذوى لاحتياجاي الخاصه وضعاف السمع
واحيانا لدى االعاديين زى اللى عندهم لثغه
او لا قدر الله مرض جلطات المخ...
يعنى انتى عايزة تقنعينى ان جوزك بيعدى من جانبك فى اليوم الواحد من 20 الى 30 مرة؟؟
ما شاء الله..
بس يمكن يكون بيطمن ع الورد؟؟؟؟؟
ممكن
ربنا يخليكو لبعض ويحفظكو ويبارك فيكو...
بسم الله ما شاء الله ربنا يباركلكوا فى بعض
ويفضل يجيبلك ورد طول العمر
ربنايسعدكوا ويجعلكوا سبب لدخول بعض الجنه
اللهم امين
انتى تستاهلى كل خير يا دوده بجد والله تستاهلى كل خير
الله اكبر
ربنا يسعدكم و يهدى سركم يا دودا
و يعيش و يجبلك يا حبيبتى
فعلاً الورد شكله يفرح
أنا بقى جالى بوكيه ورد حلو زى بتاعك كدا و حطاه جنبى و كل شوية أبصله أفرح
أصله جايلى من إتنين حلوين قوى قوى
و قريبين من قلبى قوى قوى
و فعلا عندك حق
حاجة مفرحة
ربنا يفرح قلبك اكتر و اكتر
يا حبيبة الروح
حضونات و بسابيس كتييييييير
الله شكله حلو اوى ماشاء الله
ربنا يخليلك جوزك والورد كمان
الف حمد والف شكر, الزهور من الكائنات الرقيقة والمعبرة جدا
انا بحسدك يا بختك
بس فعلا اجمل هديه ورد مفيش احسن من كده
هههههههههههههههه
على الرغم من إنى ماعرفش جوزك إلا إنى أقدر أقول إنة ذكى جدا فيما يختص بمعاملة النساء ..
ربنا يديم عليكم نعمة السعادة
تحياتى لزوجك ( الحريف )
ادعو الله ان يديم عليكما السعادةويرزقكما الذرية الصالحة
علشان يعرفوا ان الستات بتفح بكلمة بسيطه وورده لا يكلف اكتر من 15 جنيها مش عاوزين وردو مستوردة لاروح فيها ولا رائحه
ربنا يبارك فى زوجك ويجعله زوج طيب صالح وانت كمان ربنا يبارك فى زوجكما
ويرضى عنكم
وبخصوص الشكر تأكدى انه فرحانه بيه قوى
عارفه ليه
لانه بيأكد له انه عمل حاجه بتحبيها
ادام الله التفاهم بينكم يا اجمل دودا
فعلا حاجه تفرح
انا مش هعلق غير
ربنا يبارك فيكم ويصلح أحوالكم
أنافعلا فرحان بيكم قوى
ماشاء الله جميل اوى الاحساس واجمل الورد ربنا يخليلك جوزك ويخليلك الورد الجميل بتاعك اوعدنا يارب ذيك
السلام عليكم
ربنا يفرح قلبك كمان وكمان يا رب
ويسعدك حبيبتى
امييييييييييين يا رب
تحياتى ليكى يا قمر
اموااااااه
بسم الله ما شاء الله
ربنا يخليكوا لبعض ويفضل يفرحك علطول
لو كل راجل يفهم ان الحاجات الصغيرة دى
ممكن نفرح بيها اوى
طب احنا طيبيبن اوى مش مفتريين واى حاجة صغيرة بتفرحنا
ربنا يفرحك كمان وكمان
تحياتى
العزيزه دودا .. تحياتى
الورد جميل .. جميل الورد
عارفه يا دودا دا ورد اسمه جلاد يولس والورد ده ما ينفعش يقطفوه وهو ورد مفتح لازم يقطف وهو براعم ومع الايام بيفتح لوحده حتى لو ما حطيتى له اى دواء كفايه ماء فقط ولو حبيتى ملعقة سكر.
والله كتر خير الراجل فاكرك بحاجه حلوه آهه دا راجل يستاهل تقله دهب.
اصل عمك فشكول كان زمان بيزرع الورد ده وكنا مع بعض الناس الجيران بنصدره لفرنسا وهولندا ونعمل له تغليف فى الغيط ونحمله فى العربيات على الطياره على بره على طول
تحياتى يا دودا وربنا يخلى لك الزوج المحترم
ربنا يخليكم لبعض ويجبلك كل اسبوعين ورد ههههههه لا بس بجد والله يفضل اسبوعين من غير ما يدب بسم الله ماشاء الله نفسى اعرف السر بئا مليش دعوة عااااا
ربنا يبارك لكم يااااااااارب وتفضلوا كده فى فرحة وسعادة مرسيى للمرورك على المدونة وعلى فكرة انا مليش دعوة بتفجيرات الحسين :(
ربنا يديم المعروف والمحبة بينكم وان شاء الله مش تكون اخر مرة بس حاولى انتى تردى بهدية على هدية الورد
البوست جميل
ربنا يوفقك فى زواجك وتكون هذه المشاعة مستمرة حتى اخر العمر
تحياتى
أكيـــــــــد
الحقيقة
ده شئ رومانتيكي جداً من زوجك من رجل يمتلك حس مرهف تجاه زوجته ويقدرها بشكل جميل
تحياتي
حسن أرابيسك
ماشاء الله اللهم لا حسد
:)
ربنا يكتر كل حاجاتك المفرحه
مش خايفه من الحسد يا دودا ولا ايه؟
:)
كل التحيه ليكي
تصدقي فعلا انها حاجا مفرحه وخصوصا انك شفتيها بزويه تانيه وانها فرحتك 15 يوم مش يوم واحد ولا حتي ساعه الموقف وبجد انا احيي زوجك علي رقه مشاعره و ربنا يهدي سركو وكلام في سرك انا لو مكاني وزوجتي جابتلي ورد هنشفه واشيله عشان يفضل وكمان لو عرفت ابروزه هعملها بس لحد دلوقتي الحقيقه انا الي بجيب بس هههههه
تحياتي وربنا يهدي سركم
الف مبروك على الورد
هههههههه
اكيد الورد قعد كتير كده علشان سقتوه بخليط حلو
حبه ليكي
وشكرك ليه
ربنا يسعدكم يارب
وده برده بوست مفرح جدا
سلاااااااااااااااام
السلام عليكم
الأخت الفاضلة
أشكرك على الزيارة ويارب يسعدكوا ويبارك فيكوا ويجعل أيامكم كلها فرح وورد وسعادة ويرزقكم بالزرية الصالحة
تقبلِِِِِِِِِِِِِِِِِِِِِِِِِِِِِِِِِِِِِِِِِِِِِِِِِِِِِِِِِِِِِِِِِِِِِِِِِِِِِِِ تحياتى
عزيزتى
طبعا الورد جميل اوى
كل شئ خلقه ربنا جميل
بس الاجمل انه من زوجك
دايمن اى شئ من اللى بنحبهم ويحبونا ليها طعم تانى
ربنا يجعل ايامك حلوه دايمن
مع زوجك واولادك ان شاء الله
تحياتى
سلام
بسم الله ماشاء الله
لا حول ولا قوة الا
بالله والحمدلله رب العالمين
فعلا ممكن حاجة صغيررررررة
تجيب سعادة كبررررررررررررة
وكتيررررررررررررررررررررررة
المهم العين اللى بتنظر لهذا الشىء
هل هى عين الرضا ؟ام عين السخط والعياذ
بالله منه ولان انتى جميلة يادودو
شفتى كل الجمال ده فى الباقة
دى ولو كانت وردة
واحدة حتى كنتى
حتشوفيها
جميلة
المهم العين
اللى بتشوف وتعى ما ترى.
ماشاء الله والا حول والا قوة الابالله
ربنا يخليكم لبعض
كنت بحب امشي حوالين حديقة الطفل اللي جنبي في مدينة نصر وبعدين كل كام يوم اشتري ورد عشان بحب الورد وبحب البيت يكون في ورد
المهم
اشتريت ورد وزي كل مره حطيته في الزهريه وكان من ضمن الورد ورده مقفوله كده صغيره وطبعا كل يوم اغير له الماء واحط مره سكر مره اسبريين رشة ملح صغيره جدا مايضرش وسبحان الله لاقيت البرعم ده كل يوم يكبر ويفتح لحد مااصبحت ورده عملاقه وكبيره جدا
في الوقت اللي باقي الورد كان دبل ومات
وهي دي الورده الحمرا اللي جنب اسمي دايما اصل انا كنت بصورها كل يوم عشان اسجل تطورها
إرسال تعليق