2008/05/01

آااااه يانى

كعادتى كل يوم اول ما بصحى..بفتح بلوج مى(نص دستة افكار)اطمن كتبت اييه؟؟ الكومنتات على كتاباتها اخبارها
ا يه؟؟؟؟
من عند مى (البواب بتاع العالم السحرى)انطلق
ادخل مدونتى من اللينك اللى عند مى وادخل عند فاتيما برضه من عند مى وانطلق بقى زى المشفوطه من بلوج لبلوج من تعليقات البلوجاويه
اتشفط النهارده عند واحده مصريه عايشه فى المانياالبلوج بتاعها فيه يوتيوب مكتوب فوقه كلام عن مصر
فتحت الفيديو عنيه دمعت..الصور فتحت جرح قى قلبى وقلوب المصريين
رغم انفي بحبك يا مصر
دى البلوج اللى فيها اليوتيوب
بحييكى مع انك وجعتينى
-----------------------
رجعت لجوباتى..اللى كتبتهم لصاحبتى وطلعت صرختى و...آه
اااه يانى
اصحى من النوم والا انام تانى؟؟؟ دى كل حاجه فيه واجعانى

راسى ورجلى وعينى وسنانى وودنى من الوجع مبقتش سمعانى

من اللى شفته فيكى عنيه مش مطوعانى..
لا عايزه ولا قادره تشوف تانى

ومهما اهرب اخبارك محوطانى... بلدى واروح فين منها يا زمانى؟؟؟

السوس فى اساسك بينخر والا بينخر فى عضامى؟؟؟؟

بلدى وامى وحبيبتى فيكى طفولتى وشبابى..
بس الشيبه قالقانى

خايفه عليكى اوى فين البهيه ام طرحه وجلابيه؟؟

بدور على الخير والسنابل اللى اتنهبوا قدام عنيه

حتى ارضى.. اللى كنت فكراها سندى من سنييين كانت بتدى..خير مشبع كل ِولدى

سامعه كلمه عمروها!!! وكمان صحرا خضروها؟؟؟

كل ده كلام اغانى.... او امانى ف كوكب تانى

الحقيقه ...دول باعوكى قسموكى وخصخكوكى..وبايديهم بوروكى

حتى ولدك اللى تعبتى فيه .. اللى هاجر ..غلطوه واللى صبر ..فى طابور العيش موتوه

ولدك المصرى كريم العنصرين!! جوعوه ونهبوا حقه من سنين

واللى ضعف فى الولاد عن وعيه غيبوه ابنك الغالى خدروه ومن كل الجهات حاصروه

بانجو ماكس.. ويا عالم ايه تانى والا اللى شافه فى قنوات الاغانى

صرخ من اللى شافه وحاله بكانى حاولت اعٌلى صوتى ..ولا ودن سمعانى

همست فى ودن امى واشتكيت من كل حاكم ظالم انانى

لقيت امى بتلطم وتسد بقى بايدها خايفه من البهدله وزمن المعتقلات اللى رجع تانى

معدش فيه اللى يسمع الشكوى؟؟ !!!!
رفعت ايدى للسما وللى يقدر على القدره اشتكيت وبكيت

يا رب لما دقيت بيبان غير بابك اتذليت يا رب خلى بلدى وخليلى فيها اهل وبيت

. ويفضل سؤالى من غير رد... اصحى والا انام تانى..
يا بلدى سمعانى؟؟؟
--------------------
فى اخر الجواب مكتوب
الى مستلمه الرساله الباسله
اللى لسه مستحمله انا لا سياسيه ولا ليا فى السياسه
وده مش لسانى ده لسان حالى...بجد مصر وجعانى
وآااه يانى

هناك 19 تعليقًا:

mado80 يقول...

dodda

إزيك

إيه الكلام الجامد ده

هاقنع نفسي إنه مش كلام سياسي مع أنه كلام سياسي درجه أولي ، بس اللي إنتي كتباه ده هو لسان حال كل المصريين مش إنتي بس

بجد والله حسبي الله ونعم الوكيل مصر بجد المفروض مكانتها تبقي أفضل من كده بس هانقول إيه بقي مش عاوز أتكلم في السياسه كفايه كده
:) :)

علي فكره أنا هاقرأ كل بوستاتك مدونتك جامده جدا
ربنا يوفقك

تحياتي ليكي وألف تقدير لشخصك الكريم

dodda يقول...

لن تتخيل مدى سعادتى بتعليقك يا
مادو
انا لسه مدونه جديديه بس انت من الناس اللى بحب مدونتهم جدا وكفايه صورتك اللى حاططها ابتسامه تبعث على اليهجه رغم ان القلوب تتألم
ومصر طول عمرها مصر وحتفضل طول ما لسه فى شباب يفرح زيك كده
الله يبارك فيك

غير معرف يقول...

اه ياني اه عاااااااااااا

كلي بيوجعني من ايه من بلدي دياااااااا

كلامك كبيييييييير وانا برضو فالاول توقعت انها هتختم سياسة

انا كمان كنت هنزل حاجة عندي المرة دي سياسية بس حسيت انها وحشة او دون المستوى لأنها عامية مش فصحى وانا بصراحة مش شاطرة فالكتابة بالعامية اوي ولما جيت كتبتها طلعت كده

لكن انتي ماشاء الله عليكي كلامك حلو جدا

تحياتي ليكي ومش عيزاكي تتنحي تاني عندي فالمدونة عيزة رأيك بصراحة :-) سلام ياقمر

dodda يقول...

نوره الخشن...اميرة الفصحى
مش عارفه الخشونه تيجى منين للنواعم اللى فى مدونتك..اتنح فى مدونتك براحتى بوست الطقوس جامد اوى..ورد الفعل الطبيعى اتنح

_ زين_ يقول...

كما وعدتك
ووعد الحر دين
وانا ليوم الدين
بحب مصر
..
بساطتك وبرائتك وشجاعتك
هم اللي شدوني
فقد كان حوارك مع طارق إمام في غاية البراءة وعدم التكلف، وممتلئ باعترافات نادرة..
والبساطة اللي بتتكلمي بيها ودون افتعال كانت حاجة جميلة جدا أكدت لي المثل اللي بيقول "كن أنت..كن أنت ولا أحد آخر"..
والشجاعة في الإعتراف بنقص المعرفة لظروف ما.. وأنك في حاجة إلى هذه المعرفة على الرغم من عدم توافر أماكن للاحتفاظ بالكتب.. برضه كان اعتراف شجاع..
المهم كلك على بعضك كنتي مثيرة للدهشة والتأمل..ياترى لسه فيه حد بسيط كده؟..
عموما سعدت للغاية بمعرفتك واعذريني على قلة زياراتي فأنا غير موجود في أغلب الأحيان..
خالص احترامي لقلمك البسيط الجميل..
زين

dodda يقول...

د.زين اشكرك لمرورك
لم اشك لحظه فى وفائك يالوعد
اسعدتنى..حينما قرأتنى
فعلا انا..انا مش اى حد
واسعدتنىبتغليقك اللى آآآد كده واللى انافهمته اوى لانى انا
@-----'---

مي بهاء الدين يقول...

آآآآآه ياني من اللي مكتوب آآآآآه ياني
أقفل البوست ولا أقراه تاني؟
اكتب تعليق ولااسيبه لحد تاني؟
أقولك أنا أحسن حاجة أخش أنام تاني
تصبحي على خير
:(

dodda يقول...

يا حبيبتى انتى تصحى براحتك او تنامى
انتى فى القلب واللى يتطلعيلى فى احلامى
وعشان عيونك امسح كل كلامى
وتصبحى على خير يا مجننننننانىىىى

Unknown يقول...

dodda
الموضوع مهم اوي بس ياريت نتكلم في حلول
مش نقد وبس

ومعلش بقي اول زياره تبقي في ظروف هباب كده

تقبلي مروري

اتمني تشرفيني

سلام

عين فى الجنة يقول...

قلبتى علينا المواجع

cinderella يقول...

اهلا دودا
علي فكره انتي جارتي في المعادي
يا خبر لنكون كنا زمايل دراسه
عموما كل شله المدرسه والنادي اعرفهم ولو طلعتي واحده منهم وعالمه مدونة من ورايا هموتك
هههههههههه

تعليقي بقي ونتكلم في الجد
تعرفي كمك فعلا مؤم
المصري اتبهدل واتمسح بيه البلاط واتعذب
ولكن اعتقد انه ده وقت التحرك
فقد فاض الكيل ولم يعد هناك حتي ورقه توت لترقيع الواقع وتزويقه
بس يا خوفي من اللي جاي يا خوفي
تحياتي لك

dodda يقول...

bar2ash
مين قال ان ده نقد؟؟؟
ده يا ابنى اسمه لطم
انا بصرخ من وجيعه ملهاش علاج
ربنا يرحمنا
سعدت بمرورك متقطعش الزيارات
مبروك مدونتك

dodda يقول...

يا باشمهندز انا لما اقلبها بدل ما تبقى مركزه ومتكومه تحت فى القاع على دماغ الغلابه
الآه فينا كلنا..آه بتاعت الوجع
طبعا مش قصدى اه فى اى استفتاء لا سمح الله انا بقول لالا لا لا لا لووو

dodda يقول...

cinderelld
انا مش اصلا من المعادى انا لسه متجوزه من خمس شهور بس وجوزى هو اللى معاديست اصيل
حى لو منعرفش بعض من اى فرصهفاتت اللى جاى اكتر ونتعرف
وحال المصريين لا ينفع فيه رفى ولا ترقيع
ان الله لا يغير ما بقوم حتى يغيروا ما بانفسهم
شكرا لزيارتك

tamer.sala7 يقول...

والله البد صعبانة عليا وعايز اعمل اي حاجة متفكري كدة وتقولي حتعملي ايه وانا معاكي

Unknown يقول...

دوددا
وحشتني تعليقاتك
عايزك تكتبي بوست جديد بقي
لان خطك وحشني
هستني
سلام


اتمني تنوريني

dodda يقول...

تامر
انا حماتى قرأت البلوج وبتقولى انت حتتسجنى
وانت بتقولى فكرى وانا معاكى...يا ترى مين فينا اللى يتسجن كده؟؟؟
ربنا كبير
المهم نتغير من جوانااااااااا

dodda يقول...

bar2ash
انت بتشرب البنج والا ايه يا دكتر
انا لسه تغليفى عندك سخن
اما عن خطى
فقلمى من المى تعبان شويه
والبوست كان فى مرحلة التخمر

غير معرف يقول...

للاسف بعد ما قريت الكلام مبقتش عارف اعبر عنى اي حاجه مبقتش عارف اتكلم بس بجد انسانه بتعرفى توصفى الحاله بشكلى جميل احييكى على اسوبلك وادعوكى لزياره مدونتى http://yosyns3.blogspot.com
إيهاب صدقى